SHILLONG: Dolsa Congress MLA-rang, uamangni dilgipa Dr. Mukul Sangmachi Congress Legislature Party (CLP) meeting-ko ka·dilani somaini bidingo sing·doaha.
Mijal Robibar-o Shillong Times songbad-na aganao Assembly bye-election-rangni bidingo chanchigrikna aro party-ni candidate-rangna dakchakna October 16-o CLP meeting-ko ka·dilani ong·enga ine dolsa MLA-rang u·iataha.
Ge·gittam Assembly seat-rangna bye-election-rango party campaign-na Pradesh Election Committee (PEC) tarimanaha una CLP meeting-ko ka·dilna nangengani gimin uamang sing·doaha.
MPCC president Vincent H. Pala chariman-ni ning·o PEC, Mawryngkneng bye-election-na chanchidilna gita party working president, Ampareen Lyngdoh-ko seokaha aro Rajabala bye-election-na chanchidilgipa ong·e CLP dilgipa ong·a, ua aganaha.
Jekon MPCC president-chi kam ka·e tarianirango jajaaniko ong·atna meeting-ko ka·china CLP dilgipa aganaha ine dolsa MLA-rang raken chanchichipaha.
Bye-election-na sal 20-an ong·jaha jeon October 30-o ong·atenga, party candidate-na campaign ka·na pilak party MLA-rang aro dilgiparang ka·dongsoenga, uamang aganaha.
“Ua meeting-ko ka·dilna CLP dilgipana somai ja·manchakkuja,’’ MLA-rang aganaha.
October 16 attam 4 bajio MLA Hostel conference hall-o CLP meeting-ko ka·na manchienga. Mawkryngkneng-oni Highlander Kharmalki-na, MLA gitcham Kennedy C. Khyriem, Mawphlang-o aro Rajabala-o Congress MLA Dr Azad Zaman-ni jikgipa segri Hasina Yasmin Mondol-ko Congress susaatenga.
