TURA: Tura-oni adita km 35-mang chel·ao mongsonggipa Jengal community health centre-ko chalaina tariengon, kobor man·soani gita ua jolni dolsa jemangan, Tamil Nadu-ni mingsinggipa CMC Vellore medical hospital-ni Garo Hills Adventist Mission-oni daktorrangko rimbaani bidingo jegale matnanganirangko janape aro sorkarioniko dakchakani tangka-paisako dabie champengaha indake golmal ong·e neng·nikaniko man·enga.
Janapna man·a Jengjal, North, East aro West Garo Hills district-ona najokegipa mongsonggipa bribra ong·gipa biapba ong·a. Ge·sa airport baksana jekon da·o chalaikuja Garo Hills-o ua biap donggipaba ge·sa ong·a.
Jekon adita bilsirangna jakkalgija indaken donenga ua Jeng jal hospital-ko chalaina Vellore-oni dol sa daktorrang baksa a·dok sorkari re·anggipa jao Memorandum of Understanding (MoU) soi ka·aha.
Sub-divisional hospital dal·begipa sanram nokmrong ong·skabaenga, jeon bang·a specialist-rangko soka chakgen aro sak 50 chakbanggipa biap ong·a.
Maibakai, Vellor-ni daktorrangchi hospital-ko chalaiako ua a·jolnirang doka-sata aro nirokegipa dolko ka·mik kenate raken jegalaha indake kajia-golmal ong·e rama dilmaoni hospital-ona dakgipa nosto ong·gipa ramako taripiltaina ru·utgija salo Directorate of Health Services-oni ingeneer-rang survey ka·eaha.
Hospital-na a·a on·gipa maharini manderangna kam on·ani bidingo tangka-paisa on·china dabie jegalangaha. “Uamangni neng·nikaniko sorkariona ra·angani pal badesa uamang survey ka·gipa dolko, engineer aro daktorrangko jemangan uamangni mamlao changkete dongjaha uamangko kajia-golmal ka·skaaha,” medical official saksa aganaha.
A·dok sorkarini koborni gita a·a nangdapgipani mamlao joljol adita sak manderangna kam on·aha, gipinrangba da·o uamangnaba kam on·pachina dabienga.
CMC Vellore doctor-rang, jemangan batanggimin bilsignina Jengjal jila jatchio nursing home ge·sako chalaienga, a·paldapatna man·jaenga aro bangbang nangenggipa kamrangna gitalgipa department-rangkoba songna man·jaenga. Vellore-oni surgeon-rang aro specialist-rang chotchanggijaan re·baenga jemangan biap chu·ongjae sangiparangko sana man·gijaan re·angpiltokenga.
Da·o, Garo Hills gimiko hospital ge·sasan dongaia jeon Vellore-oni sak gittam paediatrician-rang aro saksa gynaecologist donga.
