TURA: Tura water supply scheme aro Phase II aro Phase III tarigipa project-rangni kam tik ong·jani a·selo Tura-o china namen dilenga. Phase I project-oniko Tura-o pilak line-rangko watenga jean skango GHADC-ni ning·o ong·achim.
Tangka gong kror 35-mang tangkani tarigipa Tura town Water supply scheme-ni aro sal batani ja·manoba Phase I, II aro III water project-rangko tariani bidingo report-na maming aganchakani dongkujaenga ua kamrangni bidingo ma·sina nangnike Deputy Commissioner-ni office-ni gita RTI segataha, Tura BJP MDC Bernard Marak parakaha.
Phase I-ni file-rang gimaenga aro gipinrango serikani dongja jerangan mongsonggipa line-rangko man·chapachim, ia koborko official-ni gita ong·gija mitam officer-rangoniko koborko man·soaha. Water works department-ni ning·o GHADC-ni watmanchagipa chi line-rang ong·a uko official-ni gita ong·gija ra·badeangaha, GHADC uamangni chi line-tangtangko den·ani bidingo uamangni gisepo jajaani ong·enga.
Ia obostarangna Chief Executive Member mitelaha aro GHADC water supply-rangoniko manderang line-rangko den·ako man·enggipa mamlako niangchina mol·molaha indake a·dok department manderangna neng·nikaniko ong·atenga.
Ja·pang Phase I-oniko pilak scheme-rangko sualaha jean skango GHADC-ni ning·o ong·achim indiba da·o adita kror tangkako PHE department-na gro nanga ine PHE a·kangaha. GHADC Executive Committee-ni ma·sigijao adita dal·dalgipa segrik-jotgrikani dongna nanga. Aroba Jal Jeevan Mission project-rang apsan chi tank-rangoniko chiko watenga jekon da·o Tura-o donggiparangna on·enga, jila a·jolo chi chu·ongrakjani a·selo china namen dile neng·nikaniko chagrongenga.
