TURA: Sombar salo, West Garo Hills a·jani District Legal Services Authority (DLSA)-ni gita International Girl Child Day ba me·chik bi·sarangni salko Bhaitbari-o donggipa Kazi & Zaman College-o manidilangaha.
Ia salko manianio West Garo Hills a·jani Chief Judicial Magistrate aro DLSA-ni Secretary MK Lyngdoh, jinmana aganprakangengon, ia sal somoirango me·chik bi·sarangni kosako ong·gija dakanirang, bilsi sokgija bia ka·atanirang aro me·chik bi·sarangko kragija dake jakkalanirang batroroengani gimin aro songsalo me·chik bi·sarangni gamchatgipa ong·ani bidingo manderangna mikrakataniko on·na ia International Girl Child Day-ko a·gilsak gimikon manienga ine talataniko on·angaha.
Me·chik bi·sarangna niamo on·gimin bil aro cholrangni bidingo talataniko on·angengon, ia niamrangko pe·genchimode mai dakgipa sastirangko man·genchim, uarangni giminba ua jinmana talate on·angaha.
Ia salko manianio me·chik bi·sarangko palbadinge cha·ani bidingo Tura-ni District Child Protection Unit (DCPU) LWR Marak, manderangna mikrakataniko on·angaha, me·chik bi·sarangni bilsi sokkugija an·o dongani bidingo Medical Officer Dr CA Sangma agan-talate on·angaha aro POCSO Act-ni bidingo Police Officer DC Marak, jinmana talate on·angskaaha.
Ia tom·anio Kazi & Zaman College-ni Vice Principal-ba dongpae jinmana aganprakangaha.
Indake ong·engon, re·anggipa October 2 tarikoni November 14 tarikona ong·atenggipa PAN India Awareness aro Outreach Program-ni bak gita dingtangmancha me·chik bi·sarangna on·gimin bilrangni bidingo Slogan sesusaanikoba National Legal Services Authority-ni ning·o West Garo Hills a·jani DLSA, Tura-ni Pechon A Sangma Police Public School-o ong·atangaha.
