TURA: Tura bazar-o dokkan dakenggipa mande saksaoniko niam gri tangka dabiani gimin aro uko kragija dake jak sokahani gimin Tura Police Station-o FIR-ko ka·aha ine kobor on·aha.
Koborko on·ani gitade, FIR-ko Tura-o donggipa Meghalaya Chamber of Commerce-ni president Wilver Greham Danggo, re·anggipa October 9 tariko ka·aha.
FIR-o parakani gitade, re·anggipa October-ni 8 tariko ma·sina man·gijagipa manderang, Tura Bazar-ni gital Council building-o dokkan dakenggipa Arvind Prasad-ni dokkanona re·ange, All Garo People’s Forum (AGPF) minggipa dolni bimingo tangka dabieaha. Dokkan nokgipa uamangna tangkako on·na jechakon, ia manderang, uko aro dokkano kam ka·enggipa gipin manderangko kragija dake dokaha aro ka·mikkenatanirangkoba on·angaha.
Ia obosta ong·aniko CCTV camera-oniko nikna man·aigen ine janapatengon, ia manderangni kosako rakgipa ja·kurangko de·china Meghalaya Chamber of Commerce, dabiangaha aro mikkangchiba iandakgipa a·selrang ong·taigenchimode Tura Bazar gimikon dokkanrangko chipe dontokgen ine mikrakataniko on·angaha.