TURA: Re·baenggipa October-ni 30 tariko ong·atna sienggipa Rajabala Assembly constituency-ni by-election-na nomination file ka·gimin candidate-rangni lekkarangko Sombar salo Returning Officer-ni office-o nipilangaha aro ia lekkarangko nipilanio nomination file ka·gipa candidate-rangoni darangba jegalako man·jaha.
Rajabala by-election-ni Returning Officer CN Sangma-ni kobor ra·timgiparangna u·iatani gitade, ia scrutiny-ko Sombar pring 11:00 bajion a·bachengani ong·achim indiba by-election-o susaenggipa candidate-rang aro uamangni election official-rang ja·manchake sokbaahani a·sel scrutiny-ko ata kontamangni ja·manosa a·bachengna man·aha.
“Scrutiny-ko dakanio pilak candidate-ni lekkarangan chu·sokgipa ong·aha aro darangba jegalako man·jaha,” ine Sangma parakataha.
Scrutiny-ko dakanio pilak candidate-rangan chu·sokahani gimin da·o ia candidate-rangna nomination-ko ra·pilani bon·kamgipa somoiara October-ni 13 tarik attamni 3:00 baji ong·gen aro uni ja·mano candidate-rangna symbol-rangko sualanggnok.
Ia chang by-election-o Independent candidate Carla R Sangma-na agrede pilak candidate-rangan political dolrangonisa ong·ani gimin symbol ba noksako saksanasan sualna nangaigen ine Returning Officer parakataha.
Congress dolni candidate Hashina Yasmin Mondol-de jakpani noksao, NPP-ni Abdus Saleh-de ki·tapni noksao, UDP-ni Ashahel D Shira-de damani noksao aro BJP-ni candidate Kingstone B Sangma-de mongnalni noksao susaengachim.
Pu·one seokaniko October-ni 30 tariko dakanggen aro vote chananiko November 2 tariko Tura-ni SMECL campus-o dakangskagen.
