TURA: West Garo Hills a·jani Phulbari constituency-ni ning·o National People’s Party (NPP)-ni working president ong·e kamko ka·enggipa John Keats K Sangma, adita salrangna skang, an·tang baksa kam ka·rimenggipa sak 300 membor-rangko rime Bharatiya Janata Party (BJP)-o napangaha ine kobor on·aha.
Sangma-ni BJP-ona re·baani somoio dingtangmancha BJP-ni state general secretary Thomas N Marak, tom·aniko ong·atenba, Sangma aro uni manderangko BJP-ona rimchaksoaha.
An·tangko BJP dolona rimchaksoani somoio John Keats Sangma, jinma aganprakengon, BJP dol pilak songadam nokadamrango donggipa kangal cholgrirangna kamrangko ka·enga ine nike ua BJP dolni kamna kusi ong·aha aro iani giminsa ua BJP dol baksa apsan kamko ka·rimna gita re·baaha ine parakangaha.
Sangma-ko rimchaksona gita tom·aniko ong·atanio BJP-ni state general secretary Thomas N Marak-ba jinmana aganprakengon, kangal cholgrirangni namgnina apsan kamko ka·rimna re·baenggipa manderangko pangnan BJP rimchaksoenga maina BJP dol gita kangal cholgrirangni namgnina kamko ka·gipa gipin dolrang dongja ine parakangaha.
Dingtang dingtang dolni dilgiparangba BJP dolo napna manchie dongenggiparang donga aro 2023 bilsini Assembly election-o BJP dol chu·sokgipa ong·telgen ineba ia tom·anio Marak, an·tangni ka·dongchakenganiko parakangaha.
