SHILLONG: Meghalaya a·doko songdongenggipa manderangoni 5 percent ba 6 percent-mangni gitade Tourism-ni tang·doaniko champengna jotton ka·enga ine Mongolbar salo, BJP-ni dilgipa aro Pynthorumkhrah-ni MLA AL Hek parakatenba, a·doko tourism-ko tang·doatna gita pilakkon apsan ja·ku de·china gita a·doko songdongenggipa manderangko didiataha.
“A·doko songadam nokadamrangosan ong·aigija jillarangoba Tourism-ara bang·bea janggi tangani cholrangko on·na man·na indiba an·ching jrip dongtokengani gimin a·doko songdongenggiparangoni 5 percent ba 6 percent-ni gitade tourism-ni tang·dobaaniko champengna jotton ka·enga,” ine Mongolbar salo Indian Institute of Tourism & Travel Management (IITTM)-o tour guide-rangni gittamgipa batch-ni pass ka·aniko maniani somoio Hek parakataha.
Tourism-ni tang·dobaaniko mitam manderang champengsoengoba tourism-ko tang·doatanichi Meghalaya a·dokko nambatatna man·gen ineba Hek parakataha.
Meghalaya a·doko samtangtango ong·telaigiparang, doka dam·ani aro git ring·ani, cha·ani ringani, chirango kal·susaani, rong·kolrang aro uandakgipa cholrang bang·en donga ine janapatengon, Meghalaya a·dokona rona re·baenggipa manderangko maikai rimchaksona ba sokachakna nanga ukosan a·dokni manderang ma·sie ra·na nangenga ine BJP MLA parakataha.
Ia tom·anio Tourism department-ni Director CV Diengdoh-ba dongpae jinmana aganprakengon, Meghalaya a·doko samtangtango ong·telaigiparang namen bang·ani gimin gipin biaprangoni re·baenggipa manderang rona namnikbata aro ian a·dokni manderangna namgniko on·skaenga ine parakataha.
IITTM-na pilak nanga dakchakanirangko sorkari on·angkugen aro mikkangchiba bang·bata tour guide-rang ia institute-oni ong·katangkugen ineba Diengdoh, an·tangni ka·dongchakenganiko parakataha.
IITTM-ni gittamgipa batch-o gimik sak 18 tour guide-rangna jagittamna training-ko on·e da·o uamang pass ka·ahachim ine nikna man·a.
Official-rangni u·iatani gitade, ia training program-o donge skie ra·na gita komibeoba class 10 pass ka·gipa ong·na nanga aro bilsi 18 batgimin ong·na nanga.
Get real time updates directly on your device, subscribe now.
Comments are closed.