SHILLONG: 2020 bilsini October ja dipetan Meghalaya State Commission for Women (MSCW)-ni chairperson-ko songe on·kujaengani gimin a·dokni Opposition Congress dol, National People’s Party (NPP)-chi dilenggipa MDA sorkariko matnangataha.
“MSCW-ni chairperson-ko indita ru·utbea somoionan songgija donaniara namen kragijani ong·a aro iana anga an·tangde namen suk ong·ja. Ia kamara namen nangchongmotgipa ong·achim indiba iani bidingo maini gimin social welfare minister ba chief minister maming ja·kurangko de·jaenga?” ine Mawsynram-ni MLA aro Congress dolna ku·wattimgipa HM Shangpliang sing·doangaha.
Salantian me·chikrangni kosako ong·gija dakanirangko nikna man·enga ine janapatengon, iandakgipa kamrangko nirokna gita MSCW-ni chairperson-ko songe on·jaskalde maming ja·kurangko de·na man·jawa ine Shangpliang parakataha.
“Uni gimin iani bidingo ta·raken niatchina aro chairperson-ko songe on·china anga Chief Minister-ko didienga,” ine Congress MLA parakataha.
MSCW-ni gitcham chairperson-na dongimin somoi bon·ani ja·mano gital chairperson-ko songna gita committee-ko songchina Thma U Rangli Juki (TUR) dolba a·dokni Chief Minister Conrad Sangma-ko didiahachim ine nikna man·a.
Indake ong·engon, COVID-19 sajinmani a·selsa MSCW-ni gital chairperson-ko songanio ja·manchakengaha ine re·anggipa September jao a·dokni Chief Minister parakatskaahachim.
Comments are closed.