TURA: Adita salrangna skang, Raksamgre Sub-Division Welfare Committee (RSDWC)-ni membor-rang aro Tikrikilla jolni Nokma aro Gaonburarangni dol, Meghalaya a·dokni Chief Minister Conrad K Sangma-ko grongenba, Raksamgre sub-division-ni ning·o dingtang dingtang sub-division office-rangko on·china didie memorandum-ko on·angaha.
Iani bidingo Chief Minister-na sedoatengon, Raksamgre-ko Civil Sub-Division songahaoba Raksamgre aro Tikrikilla jolrango maming namroro silroroanirang dongjaenga aro ian biap chel·grikani giminsan aro ia jolrango ma·manti ong·gija kamrangko nikna man·rongani giminsan sub-division songa gita ong·enga ine committee-ni membor-rang parakataha.
Ia Raksamgre civil sub-division-ni ning·o dingtang dingtang department-ni sub-divisional office-rang dongkujaengani a·sel namroro silroroanirangko ra·bana man·jaenga ineba committee parakataha.
Jolo namroro silroroaniko ra·bana aro sorkarini kamrangko manderangona sepangbate ra·bana gita sorkarini mongsonggipa department-rangko nangenga ine janapatengon, Raksamgre-o sub-divisional election office, sub-divisional supply branch office, sub-divisional police station (Home) aro sub-divisional school education office-ko songe on·china gita ia committee-ni dilgiparang dabiangaha.
Indake ong·engon, Dadenggre aro Raksamgre jolrangko man·chape dingtang Dadenggre district-ko songe on·china Dadenggre NPP Block Committee aro Dadenggre District Demand Committee dabiengani gimin, ia gital district-na dabianio Raksamgre Civil Sub-Division-kode watchangchina gita committee-ni membor-rang mol·molatskaaha.
