TURA: Natural Resource Management-ni bidingo legal awareness program-ko mijal Budbar salo, Asibra, Sella Wari aro samba jolo donggipa dingtang dingtang songni manderangna, Tura jillani samba jolo donggipa Sella Wario ong·atangaha. Ia awareness program-ko Dalmagre, Gongronggre, Songkonggre, Wakantagre, Do·renggre, Sasatgre, Do·pananggre, Ringgi Songgital aro uandakgipa songni manderangnaba ong·atangaha aro ia program-ko West Garo Hills a·jani District Legal Services Authority (DLSA), Soil & Water Conservation department baksa nangrime ong·atangaha.
Ia awareness program-ko ong·atanio Tura-ni District & Sessions Judge aro DLSA-ni Chairperson Dasha R Kharbteng, a·jao DLSA-ni kamrang aro niamrangni bidingo manderangna talate on·angengon, NALSA-ni ge·etanio pangchake DLSA, manderangna indin dakchakanirangko on·enga ine sorkarini on·enggipa dakchakanirangko ra·china gita jolo songdongenggipa manderangko didiangaha.
Ia program-ko ong·atanio Tura-ni Chief Judicial Magistrate aro DLSA-ni Secretary MK Lyngdoh-ba jinmana aganprakengon, Tribal manderangara India a·songni mongsonggipa bakrango songdongenggipa manderang gita ong·gija dingtang janggi tangani bewalko ja·rika aro a·song jakgitel ong·chengaonin India sorkari, Tribal-rangni bilko chel·chakna gita dingtang bil aro cholrangko on·aha ine parakangaha.
Ia program-ko ong·atanio Tura Soil & Water Conservation (T) Division-ni Divisional Officer C Ch Marak-ba dongpae jinmana aganprakengon, samtangtango ong·telaigiparangko ripinge rakkina nangengani gimin jolni manderangna mikrakataniko on·angaha.
Ia program-ko ong·atanio dongpae jinmana aganprakanggipa gipin manderangara, Soil & Water Conservation department-ni Joint Director Monjula Momin, Assistant Soil & Water Conservation Officer Renard M Sangma aro gipinrang ong·a.