TURA: Jengjal-o rike donenggipa primary health centre (PHC)-ko chalaina gita Seventh Day Adventist (SDA) Missionary-rangna pakwate on·na manchianiko Jengjal jolo donggipa AAYF, ADE, GSMC, AHAM aro FKJGP dolrang raken jegalataha.
Ia nangrimgimin dolbonga NGO-rangko dilenggipa secretary AT Sangma-ni parakatani gitade, ia PHC-ko ru·uta bilsirangna skangan rikmanahaoba indita bilsirangna jakkalchipgija donaiahachim aro da·o ia PHC-ko sorkari, SDA missionary-rangnasa pakwate on·skana manchiengahachim.
“Ia PHC-ko rikmanani ja·mano maini gimin da·o sorkari an·tang chalaigija SDA missionary-rangnasa pakwatna miksongskaenga? Ia PHC-ko sorkari jako ra·e ta·rake kuligenchimode Jengjal jolrango donggipa bang·a manderangan sanna bananirangko ra·aniosan ong·aigija dingtang dingtang kamrang jekai, birth certificate aro uandakgipa nangchongmotgipa lekkarangko doctor-rangni see jote on·aniko man·tokpagnokchim,” ine ia dolbonga NGO-rang parakataha.
Ia nangrimgimin NGO-rangko dilenggipa secretary AT Sangma-ni parakatani gitade, Jengjal-o rikmangimin PHC-ko sorkari kuligija donchipengani a·selan Jengjal jolrango donggipa manderang, da·oni gita doctor-rangni see jote on·aniko ra·namangba Asanang PHC-onasa re·ange ra·tokna nangengachim aro iani a·selan chel·a biaprango dongpagipa manderangde neng·nikanirangko man·tokengachim.
“Ia PHC-na a·arangko on·gilgipa manderang, sorkarina ka·dongesa an·tangtangni gamchatgipa a·arangko on·giltokaha indiba ia PHC-ko sorkari an·tang chalaigija private dolrangnasa pakwatgenchimode manderangni ka·donge dakani indin ong·gramaignok,” ine dolbonga NGO-rang parakataha.
Indake ong·engon, ia jegalaniko sorkari manigija SDA-na pakwate on·angkugenchimode sorkarini kosako rakgipa ja·kurangko de·anggen ineba ia dolbonga NGO-rang, mikrakataniko on·angaha.