SHILLONG: Ge·gittam seat-rangna ong·nasienggipa bye-election-na campaign ka·na man·ani sal antignian ong·jaha. Meghalaya-o 13-gipa Mawryngkneng, 24 Mawphlang aro 47 Rajabala ge·gittam assembly constituency-rangna by-election-ko October 30-o ong·atgen aro November 2-o vote-rangko changen.
Rajalaba-o, Chief Minister, Conrad Sangma mijal Sonibar-o party candidate, Abdus Saleh-na campaign ka·eaha. A·jol aro a·dok-o gimikni gita namroro-silroroatna uamang ku·rachakaha uamang baksa chinga donga ine Chief Minister aganaha.
Rajabala-o dingtang dingtang susaenga, uandake Congress, MLA gitchamni jikgipa Hashina Yasmin Mondal-ko suaatenga, United Democratic Party, MDC ong·enggipa Ashahel D Shira-ko susaatenga.
BJP uamangni party dilgipa Kingstone B Marak-ko susaatenga. Minggipin Mawphlang-oba UDP-ni Eugeneson Lyngdoh, Congress-ni Kennedy Khyriem aro NPP-ni Lamphrang Blah, susaaenga.
Mijal Sonibar salo Congress-ni party dilgiparang HM Shangpliang, aro gipinrang constiency-ni dingtang dingtang a·jolrango Kyriem-na campaign ka·angaha. Shangpliang, Sonibar-o Laitmawsiang aro Mawphlang Khlieh Shnong-o campaign ka·aha aro cheode constiuency-o party jeko daitko jako ra·anggen namroro-silroroani bidingo ua aganaha.
Congress dilgiparang campaign ka·mitingo gamgiparangni, petrol dam rakroroani aro matchu be·en cha·ako champengani unagreba jemangan covid-19-ni obostamitingo jemangan dakchakaniko man·gijagipa hajira kam ka·giparangni uandakgipa mamlarangni gimin aganangaha.
Party campaign ka·ao Opposition chief whip, PT Sawkmie dongpaaha aro Congress aro NPP dolgnina namen rakbegipa susaani ong·enga ine ua aganaha.
UDP-ni a·gipi dilgiparang jedake Jemino Mawthoh aro Titos Chyne-maang Mawphlang-ni Pamsanngut aro Kyrphei aro Rangshang a·jolrango party-na campaign ka·aha.
Aroba Mawryngkneng constituency-o, NPP aro UDP dolgnian party-na uamangni chugipa gadangni dilgiparang baksa campaign ka·angaha.
