SHILLONG: Ru·uta bilsirangoni Assam aro Meghalayani gisepo sima arirangko tik ka·grikna man·chipgija dongengon, ianchango on·sregrikani policy-ko ra·gatenba sima arini golmalrangko namatna gita a·dok damgnini gisepo nangrime re·mikkang-engon, Ri·bhoi district-ni ning·ogipa Assam-Me-ghalaya sima ario donggipa Maikhuli, Jongkhuli, Pil-angkata dakgipa song-rango donggipa A·chik, uamangni songrangko Assamchi pakwatatna gita Meghalaya sorkarini miksonganiko NGO-rang raken jegalataha, Megha-laya sorkarini daka kamrang, ia A·chik song-rango songdonggipa-rangna namen jajrengbeani ong·enga, jemangan ru·uta bilsirangonin Meghalayan- citizen-rang ong·eng dongenga aro uamangni ma·gitcham pagitchamrang Meghalaya man·chengaoni Meghalayani citizenship ong·e songdongaha. Uamang state assembly election-rango puonbaenga aro uamangko Meghalaya-ni electoral roll-rangon biming segataha. Indake ong·genchimoba re·anggipa somoio A·dok damgnini gisepo agangrikanirangko nikon, Meghalaya sorkari, songni nokni manderangming mamingkoba golpochenggijan, ia songrangko Assam-na pakwatatna gita chanchiengaha ine nikatna man·a aro iarangni bidingoba songni manderangnaba u·iataba dongja, ine NGO-rang matnange aganataha.
Indake ong·engon, ia songrangko Meghalayaon donangkuchina ADE, GSU, AYWO, FKJGP aro FAF, Meghalaya sorkariko didiaha, aro chinga Garo Hills-ni NGO-rang, ia songni manderang baksan aro uamangni bilna dakgrikanio uamangna chu·gimik chakpaaniko on·gen ineba NGO-rang janapataha.
Jeko bon·kame tik ka·grikna skangba, authority-rang ia songrangona re·ange che·em che·em sandie nichengna nanga aro manderangni ku·rangko knachakna nanga aroba democratic-ni bewalosa gimikkon namataniona ra·bana nanga ineba NGO-rang dabiaha. Unomitingo Chief Minister an·tangan ua songrangona re·angenba manderangni ku·rangko knana nanga ineba Garo Hills-ni NGO-rang didianiko on·aha.
Unigisepon uamangni dabianirangko knachakjaode NGO-rang aro Garo Hills-ni manderang mikkangchi sorkarini kosako jingjengatanirangko dakanggen ineba janapatjolaha.
