SHILLONG: Mawkynsah songo secondary skul, India sorkarini a·bachengatgipa Internet connection ka·e on·aniko bang·a e-learning-o skie ra·giparang da·o adita namgniko man·gnok. Internet connection-ko man·e manderangko uamangni ka·sarangona sepangatna man·aiasan ong·aija indiba bang·arangkon sepangbatatna man·gnok.
West Khasi Hills district-ni Mawkynsah songo donggipa Bharatnet site-ko Azadi ka Amrit Mahotsav-ni bak gita North East Telecom Department LSA, kulie on·angaha. DDG (Rural) Dilip Kumar aro DDG(Security) R K Maheshwari-maang BBNL Sh. Shamad Mahajan-oniko staff baksa oprake on·ani tom·tomako mikkim chaataha.
Ia namen ta·rakgipa inter sale on·ani skulo poraigipa chatro-chatrirangna dakchakani ong·gnok ine uni kusi ong·aniko Headmaster Brailian Lyngdoh janapaha.
Headman Banteilang Lyngdoh aro songni secretary Pynshainlang Nongrang-maangba songni gipin manderang baksa tom·ao dongpaaha.
Mawkynsah-o BharatNet site-ko oprake on·achi Meghalaya da·o song damsa a·gilsak gipinona sepangbatgipa damsa ong·taiaha. Apsangipa VSAT site-rangkoba, BharatNet project-ni da·o kam ka·enggipa Ph-II-ni ning·o gimik 599 songrango songgnok jeon Ph-I-ni ning·o je site-rangko song 98-o songmanaha. Bangki songrango sale on·gnigiparangko project-ni ge·gipin bakni ning·o ong·enga jekon a·bachengkujaenga.
Ia a·songni project-ni miksongani a·song gimikni gimik lak 2.5 Gram Panchayat-rangna ta·rakgipa nambatgipa inter-ko sale on·na miksongani ong·a.
Iarangna agreba Telecom Department, Meghalaya-ni dam 1164 internet man·kugijagipa songrango 4G connectivity-ko on·a mobile tower-rangko songna tangka-paisakoba chamataha. Ia miksonggipana 878 odd tower-rangko songgen jeon a·doko rama dilmarang baksana ge 11 tower site-rangko songna miksongenga.
Ontimgipa chi darerang, tangsimgipa a·bri-a·churang, nitogipa a·brirang, bang·a gipin nitoarangni gisepo Meghalaya ong·telaigipa bakrang baksa nangrimani golpo donggipa ong·a. Aro ua telecom connectivity donganichi ia golpoko a·gilsak gimikna knaatna chol aro rama ong·chongmoten.