TURA: Garo Hills-o jeje project-rangnan pangchakanirangko songaha aroba jeje project-rangko tong·dipet rike galengachim, uarang pilakko matchotattokchina gitaba Niksamso A·chik soceity (NAS), A·dokni Chief Minister Conrad Sangmako didiataha.
A·chikrangna ku·rang on·na gita Meghalaya a·doko A·chik jattangan Chief Minister ong·ani gimin aroba uni niksenggipa dilgipa ong·anio chinga namen kusi ong·achim aro rasong chaachim, NAS aganaha.
Ua Chief minister-ni kamko jako ra·na a·bachengaon, Tura-o MP stadium, Damalgre-o Multi playground, Chibagre-o Hydro Power Dam, Karkuta-o nitogipa gallery donggipa playground, Tura-oni Dalu-ona tarigipa rama, uandake Garo Hills-ni dingtang dingtang biaprango pangchakani ro·ongrangko bang·en songaha aro dal·dalgipa namroro-silroroanina miksonganirang baksa Garo Hills-ko bimang dingtangatna gita chief minister uni miksonge re·chakkataha. Jattangan Chief Minister ong·ani gimin ian A·chik A·songna on·pilskaani gitaba ong·achim ine Niksamso A·chik soceity (NAS)-ni General Secretary Tengrak Marak aganaha.
Garo Hills-ko namroro-silroroatna ku·rachakeba, ku·rachakatangko be·en pil·atjani ba chu·sokatjani gimin aiao inmanpila maina uni bil-sason ka·ani bilsi bri ong·angpilani ja·manoba uni kam mingsaba matchotan dongkuja, pangchakanina ro·ong songgipa gimikan tong·dipet ong·tokenga, indake uni ku·rachakanirang manderangko tol·asan ong·aija indiba cha·bokenggipaba gitaba ong·enga. Ganol chibima jolgimik Chibagre-o Hydro Power Dam, Tura-Dalu rama, Jengal-o Airport, Tura-o MP stadium, Garo Hills-o uni kam project gimikan matchotgija indaken dongenga, Damalgre-o Multi playground-ko a·bachenga dongkuja, Karkuta-o playground-naba pangchakani ro·ongko songari kam a·bachengkuja aro bang·en pangchakani ro·ongrangko songdamdame donaiengkua aro a·bachenggiminrangba tong·dipet ong·tokenga indiba an·tangni man·gnina bading-chiwalani nokrangko rikgipakode matchotgija galchipani kattaan dongja, ta·raken matchotatna hang jang dakaha ine Tengrak Marak aganaha.
Chingni chief minister, gimikchin pangchakani ro·ongrangko songe on·mangmangari galchiapaia. SMELC, nokchura, Urban slums housing complex, Ampati civil hospital unagreba mitam nokchurarang aro project-rang matchotaha uarangde skango bil-sason ka·anggipa sorkarini jakmasa ong·a ineba Marak jaksi ote aganaha.
Unigimin da·o pilak ka·enggipa project-rangko matchotatchina chinga mande ra·an baksa sorkariko mol·molata ong·jaode, uni sason ka·ani da·o bilsisasanjok, batanggimin bilsibrini somoion matchotatna man·jaode bilsisaode bate neng·batnok. Pangchakani ro·ongko songdamdame A·chikrangko kusi ong·timangata indiba pilak ku·rachakanirang bangbango gimangaia ineba NAS matnangaha.
Ru·utgija salrangna skang mangmango chief minister, social media-o uni Facebook-o Damra-oni Bajengdoba rama aro North Garo Hills-ona re·a-doanio namen mongsonggipa ong·a ine agane Mendipathar gita Damra-oni Bajengdoba-ona aro Resubelpara ramako September jaoni tarichakkatgnok aro September 2021-o a·palbatatgen ine aganaha indiba da·o October ja ong·jok kamkode a·bachengkuja ineba Tengrak Marak aganaha.
