TURA: Adita salrangna skang, Meghalaya AIDS Control Society (MACS)-ni Shillong-o ong·atanggipa State Level Red Ribbon Quiz Competition-o Tura-ni Don Bosco College, skanggipa biapko man·e chegipa ong·aha.
Iana skang, District Level Quiz Competition-ko Meghalaya a·dokni pilak biaprangon ong·atangahachim, jeon dam 40 college-ni chatro chatrirang bakko ra·e, ia district level-o chegiparang, State Level Quiz Competition-o bak ra·na cholko man·skaahachim.
State Level Red Ribbon Quiz Competition-ko Shillong songjinmao ong·atangaha aro ia susaanio skanggipa biapko Tura-ni Don Bosco College, gnigipa biapko Shillong-ni Seng Khasi College aro gittamgipa biapko North Garo Hills a·jani Mendipathar College cheangskaaha.
North East Regional Level Quiz Competition-koba da·o re·baenggipa December jao ong·atna sienga aro ia susaanio Tura-ni Don Bosco College, Meghalaya a·dok gimikni pal bakko ra·angskagnok.
