SHILLONG: Meghalaya a·dokni damgittam Assembly constituency-ni by-election-ko chena gita tangka sualenga ine sakkirang donggenchimode Election Commission (EC)-na badi ka·na man·aigen ine National People’s Party (NPP)-ni state president WR Kharlukhi, Congress dolni dilgipa Ampareen Lyngdoh-ko ra·biataha.
“Manderangko salna gita chinga tangkarangko sualenga ine uo sakkirang donggenchimode ua Election Commission-o badi ka·na mam·aigen. Uni Election Commission-na badi ka·aniko darangba champengna man·jawa,” ine NPP-ni state president aro a·dokni Rajya Sabha MP WR Kharlukhi parakataha.
Congress MLA-ni matnanganirang kakket ong·genchimode EC, nanga gita ja·kurangko de·aigen ineba ua aganaha.
By-election damgittamna NPP-ni tarisamsoanirangni gimin janapatengon, seat damgittamkon NPP chegen ine NPP-ni state president a·kangataha.
“Chingni hisapsoani gitade da·o dipet chinga gipinrangna bate nambatengani gimin ia seat damgittamkon chinga chena ka·dongenga,” ine Kharlukhi aganaha.
Kharlukhi-ni aganani gitade, ia constituency damgittamon NPP-ni dilgiparang rakbee kamrangko ka·soengaha aro ia constituency-ni pilak biaprangonan NPP-ni dilgiparang wenengaha.
Batanggimin somoirango Rajabala aro Mawryngkneng constituency-rangko Congress dol rim·kepna man·ahaoba ia changode obostarang dingtanggnok ineba NPP-ni state president parakataha.
Congress dolni kosako matnange aganangengon, Meghalaya a·dokosan ong·aigija a·song gimikon manderang, Congress dolko jegaltokaha aro iako manderang namen ma·sia ine Kharlukhi aganaha.
Indake ong·genchimoba, manderangsa dilgiparangkode seokgen aro manderangni namgnike seokaniko political dolrang ra·chakna nanga ineba ua aganaha.
