SHILLONG: Meghalaya a·dokoba COVID-19 giproroahani a·sel bilsi gimikan skulrangko chipe donani ja·man da·o COVID-19 sajinma komiangahani gimin Meghalaya a·dokni jillarango chonchongipa class-rangkoba kulipiltaina gita a·dokni Education department, Health department-ni u·iatanina sengengkua.
Re·anggipa bilsio aro ia bilsioba COVID-19 sajinmani a·selan skulrangko aro mongsongbate chonchongipa class-rangko chipe donna nangtokahachim indiba bang·bata skulrangon, chubata gadangni class-rangkode re·anggipa jarangonin kulipiltaina a·bachengtokahachim.
Meghalaya a·dokni skulrango aro mongsongbate songadam nokadamrangode, class 6-oni class 12-ona kingkingan da·o chu·gimik class-rangko ra·piltaiengahachim indiba jillarangode da·o dipet class 5-ona kingkingan skulrangko kulipilna gita on·kujaengachim.
Indake ong·engon, da·o songadam nokadamrangode chu·gimik skulrangkon kulipiltaiengaha aro jillarangoba class 1-oni class 5-onaba skulrangko kulipiltaina gita sorkari cholrangko niengaha ine a·dokni Additional Chief Secretary DP Wahlang parakataha.
“A·dokni jillarangoba class 1-oni class 5-ona skulrangko kulipilna gita Education department, Health department-ni u·iatanina sengengkua,” ine Wahlang parakataha.
Chonchongipa class-rango poraienggipa bi·sarangkode pass ka·gopataigenma ine sing·on, da·o dipet iani bidingo Education department chanchia dongkuja aro pilak ja·kurangko de·na skangba obostarangko name nichenggen ine Wahlang parakataha.
