TURA: Re·baenggipa October 30 tariko ong·atna sienggipa Rajabala Assembly constituency-ni by-election-na dingtang dingtang dolrang bilakbee campaign-ko ka·sotokengahaon Congress dolni dingtang dingtang dilgiparangba, Rajabala-ona re·ange doltangni candidate aro Rajabala-ni gitcham MLA Dr Azad Zaman sagini jikgipa Hashina Yasmin Mondal-na bilakbee campaign-ko ka·tokengaha.
Congress dolni candidate Hashina Yasmin Mondal-na campaign-ko ka·na gita dingtangmancha Robibar attamo Rajabala-o jinma tom·bimonganiko ong·atangaha aro ia tom·anio Congress Legislature Party (CLP)-ni dilgipa Mukul Sangma, Rangsakona-ni Congress MLA Zenith Sangma, Mendipathar-ni MLA Marthon Sangma, Dengnakpara-ni MDC Sadhiarani Sangma aro gipin dilgiparangba bakko ra·angaha.
Ia tom·anio Congress dolni dilgipa Mukul Sangma, jinmana aganprakangengon, Rajabala Assembly constituency-ni itihaso skanggipa changna me·chik candidate susaenga aro ian me·chik dilgipanaba cholko on·na gita namgipa chol ong·enga ine parakangaha.
“Ian Rajabala constituency-o itihasko tariani ong·enga maina Rajabala-o skanggipa changna na·simangni jatonin me·chik saksa dilgipa ong·na susaenga. Na·simango chu·onga gitan dilgiparang donga ine na·simang bebera·a ong·ode hai ia chango an·ching ku·cholsan itihasko tarina,” ine Sangma aganaha.
Ia tom·anio NPP-ni gitcham candidate aro Congress dolo napdaldalgipa Mizanur Rehman Kazi-ba dongpae, Congress dolni candidate-na campaign ka·angengon, NPP-ni candidate Abdus Saleh-ni kosako matnange aganangaha.
“2013 bilsini Assembly election-na skangde ia jolo darangba gitcham minister Abdus Saleh-ni gimin ma·sigiparang dongkujachim. Mahendraganj constituency-ko ST-rangna reserved seat dakatani ja·mansa ua jattangni manderangko sandina a·bachenge changgnina kingking Rajabala constituency-o susaahachim indiba chu·sokgipa ong·na man·jaha,” ine Kazi aganaha.
Ia tom·anio ua NPP dolkoba matnange aganangaha aro gipinrangna chanchigija Congress dolni candidate-nan pu·onchina gita constituency-ni manderangko didiangaha.
“NPP dolde ia by-election-ko a·dokni Chief Minister Conrad Sangma-ko mingesa susaenga. Uni gimin na·simang CM-ni bimingko dal·bate ra·genma an·tangtangni constituency-ni namgnina chanchigen, na·simangni jakonjok,” ine Kazi aganaha.
Rajabala constituency-ni gitcham MLA Dr Azad Zaman siangahani a·selan Rajabala by-election-koba ong·atna nangengachim aro ia by-election-o sianggipa MLA-ni jikgipa Hashina Yasmin Mondal, Congress dolni candidate ong·e susaengachim.
