SHILLONG: By-election-na dongimin Model Code of Conduct (MCC) ba niamrangko pe·ahani gimin Rajabala Assembly constituency-ni by-election-o National People’s Party (NPP)-ni candidate ong·e susaenggipa Abdus Saleh-na show cause notice-ko on·aha.
Kobor on·timgiparangni u·iatani gitade, re·anggipa October-ni 13 tariko election official-rangoniko permission ra·chenggija jinma tom·aniko ong·atahani gimin aro ia tom·aniko dongimin somoina bate ong·atan baksana COVID-19-ko warachakna dongimin niamrangko pe·e ong·atahani gimin Rajabala by-election-na dongimin Returning Officer, NPP-ni candidate-na show cause notice-ko on·aha.
Returning Officer-ni show cause notice-na aganchakaniko on·angengon, ua salo NPP dolni gita jinma tom·aniko ong·atani dongjachim indiba election-na campaign ka·anio kamrangko chanchirimna gita doltangni manderang baksa chanchirimanisan ong·aiachim ine NPP-ni candidate Abdus Saleh talataniko on·angskaaha.
Ia tom·anio uamang COVID-ni niamrangko ja·rikesa ong·atahani gimin official-rangoniko permission ra·chengna nangani dongjachim ineba Saleh parakataha.