TURA: 7th Meghalaya Police (MLP) Battalion-ni headquarter aro Integrated Police Housing Project-ko South Garo Hills a·jani Mindikgre songo songchina didie Garo Students Union (GSU) Mindikgre regional unit, a·dokni Director General of Police (DGP)-na sedoataha.
Iani bidingo a·dokni DGP-na sedoatengon, ia 7th MLP Battalion-ni headquarter-na kragipa biapko sandichina gita South Garo Hills a·jani gitcham SP Abraham T Sangma mol·molahani gimin, Mindikgre songni Nokma an·tangan biapko on·manahachim ine GSU Mindikgre unit-ni president Greneth M Sangma parakataha.
Ia 7th MLP Battalion-ni headquarter-ko North Garo Hills a·jao songchina gita Kharkutta-ni MDC Cherak Momin-ni dabienggipani bidingo janapatskaengon, North Garo Hills a·jade East aro West Garo Hills a·jaoni bang·e chel·jani gimin ia battalion-ko Garo Hills-o diltubatsranggipa South Garo Hills a·jao songna man·ode nambatgen ine Sangma parakataha. GSU Mindikgre unit-ni president Greneth Sangma-ni parakatani gitade, South Garo Hills a·jara Meghalaya a·dok gimiko diltubatsranggipa biap ong·e ia jolrangon ong·gija dakgipa kamrangko aro Bangladesh a·songoni niam gri badingsrukanirangko nikna man·batronggipa biap ong·ani gimin South Garo Hills a·jaon 7th MLP Battalion-ni headquarter-ko songna nangbatenga.
“Uni gimin 7th MLP Battalion-ko South Garo Hills a·jaon nangbatenga ine chinga chanchia aro ia a·jao ong·enggipa obostarangko nie chingni ia dabianiko chu·sokatgen ine chinga ka·dongenga. Ia 7th MLP Battalion-ni headquarter-ko South Garo Hills a·jao dongenchimode ia jolrango ong·gija dakgipa kamrangko komiatna dakchakanisan ong·aigija a·jani police dolrangkoba bilakbatatna dakchakani ong·gen,” ine Greneth parakataha.
South Garo Hills a·jara Bangladesh a·song baksa nangchapgipa biap ong·e skangonin bobil dake chakatgipa manderangni re·ruraanirangko nikna man·ronga aro 7th MLP Battalion-ni headquarter-ko Baghmara-o kuligenchimode iandake bobil dolrangni re·ruraanirangkoba nambate nirok sandina man·gen ineba GSU Mindikgre unit parakataha.
