SHILLONG: Budbar pringo Umroi bypass ramao gari bolgni chatinggrike a·sel ong·anichi saksa so·otako man·aha aro sakgipin bilongbee saknaanirangko man·aha.
Police-rangni u·iatani gitade, Silchar-oni Guwahati-ona re·angenggipa AS-11G 7819 gari bolsa, mikkangchi re·baskaenggipa NL-01AA 9137 truck gari baksa, Umroi bypass ramao donggipa Umtyrnah songo chatinggrike a·sel ong·aha aro ia a·sel ong·anio Silchar-oni re·baenggipa garini driver so·otako man·aha aro ia apsan gario re·baenggipa sakgipin mande saksa bilongbee saknaanirangko man·aha. Saknaa man·gipa mandeko bakan Shillong Civil Hospital-ona ra·angaha.
Gari a·sel ong·anio sianggipa mandeara Assam Karimganj-o donggipa Badarpur songoni Azaz Ahsan Rahmani minggipa mande ong·achim ine ma·sina man·aha.
Ia mandeni manggisiko ja·mano Nongpoh Civil Hospital-o post mortem ka·aha.
