SHILLONG: Meghalaya Democratic Alliance (MDA)-o bakrimenggipa United Democratic Party (UDP) aro National People’s Party (NPP) dolrangko Meghalaya Pradesh Congress Committee (MPCC)-ni president Vincent Pala, tangka jakkalsretenga ine matnangattaienba, a·dokni pilak ramarango donggipa COVID camp-rangkoba ia dolgnian an·tangtangna ATM dake jakkalenga ine parakataha.
Iani bidingo kobor ra·timgipa manderang baksa agangrikengon, Meghalaya a·doko Congress dolni sorkariko chalaiengmiting somoiode da·o gita a·dokna maming mangri ong·atani kamrangko nikna man·jachim indiba da·alo a·dokni pilak biaprangon niam gri kam ka·anirangkosa nikna man·engaha ine Pala, NPP-chi dilenggipa MDA sorkariko matnangataha.
“Chingni (Congress) somoiode maming ong·gija dakani kamrangko nikna man·jachim indiba da·alo pilak COVID camp-rangan UDP aro NPP-ni ATM-rang gitasa ong·engaha,” ine MPCC-ni president, Budbar salo kobor ra·timgiparangna aganaha.
Shillong-oni Jowai-ona dakanggipa ramao dingtang dingtang gate-rangko kulie MDA sorkari, da·o election-na ATM gita jakkalenga ineba ua matnangataha.
MDA sorkarini kamo kusi ong·jae manderang Congress dolko nangniktokengaha ine janapatengon, manderang an·tangtangna namgipa dilgiparangkosa Congress doloniko nangniktokenga ine Pala parakataha.
Re·baenggipa October-ni 30 tariko ong·atenggipa a·dokni damgittam by-election-kon chena gita ua aro Congress Legislature Party (CLP)-ni dilgipa Mukul Sangma, rakbee kamrangko ka·enga ineba MPCC-ni president parakataha.
COVID-19-ko warachakna dongimin niamrang dongani gimin ia damgittam constituency-rangon Congress dol, chonchonesa tom·anirangko ong·atenga ine janapatengon, da·o dipet ia damgittam constituency-rangon Congress dolna balwarang nambatenga ine Pala parakataha.
Ia damgittam constituency-rangon dingtang dingtang dolrang kamko ka·enga ine janapatengon, gipin dolrangna bate Congress dol, rakbate kamrangko ka·enga ine Pala aganaha.
By-election-ni ja·mano bang·a dilgiparangan Congress dolo napna sienga indiba gitcham MLA-rang aro minister-rang Congress-o napna skangba uamang high command-ni ra·chakaniko nangenga ineba ua aganaha.
“January-February ja bon·angachibara chinga dingtang dingtang program-rangko ong·atanggen aro ia program-rangko ong·atanio bang·a dilgiparangan chingni dolona re·bagen,” ine Pala aganaha.
