SHILLONG: Meghalaya a·dokni samtangtango ong·telaigiparangko ripingna gita dingtang dingtang kamrangko a·bachengatahani gimin October-ni 22 tariko ‘Down to Earth’ dolni ong·atenggipa online training program-o a·dokni Forest & Environment Minister James PK Sangma-ko saksa mongsonggipa ong·e aganprakna okamataha.
Kobor on·timgiparangni u·iatani gitade, ia online program-ko ong·atanio Sangma, salgro salaram jolni dingtang dingtang kobor on·timgiparangna aganprakanggen aro uni aganprakanio ua, a·songo maikai climate-ni dingtangbaanichi salgro salaram a·dokrangoba nangchakeaniko man·engachim, uarangni gimin talataniko on·anggen.
Meghalaya a·doko maikai Forest & Environment department, a·doko songdongenggipa dingtang dingtang jatrang baksa samtangtangko ripingna kam ka·engachim, uarangni bidingoba ia program-o ua talataniko on·anggen.