TURA: Garo Hills-ni B Mahal-o donggipa a·arangko palna ba ma·ekatna skangba dongimin niamrango pangchake kakketko am·sandichengchina gita Bristibar salo, Tura-ni MDC Bernard N Marak, Garo Hills Autonomous District Council (GHADC)-ni dilgiparangko didiataha.
Iani bidingo GHADC-ni Deputy Chief Executive Membor aro Land & Revenue-ni in-charge Nikman Ch Marak-na sedoatengon, GHADC-ni ia a·ani nokgipa ong·ja indiba a·brirango songdongenggipa Tribal-rangko chel·chakgipasan ong·aia aro a·brini Tribal jatrangsa ia a·arangni nokgipa ong·a ine Tura-ni MDC talataniko on·angaha.
“GHADC-de ia a·arangni nokgipa ong·jani gimin ia a·arangko palna ba tik ka·e on·na bil dongja. Ia a·bri jolrango songdongenggipa manderangsa ia a·arangko pala ba palgijanikode tik ka·na bil donga,” ine Marak parakataha.
Autonomous District Council ning·o donggipa a·arangara District Council-ni ong·ama ong·ja ine sing·anina Gauhati High Court-ni ‘ong·ja’ ine rai on·aniko toe janapatengon, ia rai on·anio pangchake GHADC, ia a·arangko kangna ba niamrangko tarina bil dongja ine Tura-ni MDC parakataha.
British-rangni somoio maikai A·chikrangna aro a·brini gipin jatrangna ia a·arangko man·e on·aha, uarangni gimin gisik ra·atpilaniko on·angengon, ia a·arangko palna ba Mauza (Non-Hill)-ona dingtangatna gita GHADC-o bil dongja indiba a·brirango songdongenggipa jatrangna aro ia a·arangko niroknasan man·aia ine Marak parakataha.
“Ia a·arangko GHADC palna miksongenga ong·ode skanggipa uamangna ia a·ako on·aha ine see on·aniko mesokchengna nanggen indiba ia lekkarangko mesokgijade palanide niamrangko aro kacharini rai on·aniko pe·ani gita ong·gen,” ine Marak talatangaha.
GHADC-ni session-o uni sing·anina CEM Benedic Marak-ni aganchakgipa kattarangko gisik ra·atpilengon, Mahal B-ni mitam biaprango Meghalaya Battalion Camp aro Solar Park-ko kulina miksonganirang donga ine Tura-ni MDC matnangatenba, iandake ja·kuko de·genchimode ia a·bri jolrango songdongenggipa Tribal-rangna on·gimin bilrangko pe·ani gita ong·gen ine mikrakataniko on·angaha.