SHILLONG: MDA sorkariko nangrime rikenggipa NPP aro UDP dolrang, tangka paisarangko jakkalsretenga aro COVID camp-rangko ATM gita jakkalenga ine Meghalaya Pradesh Congress Committee (MPCC)-ni president Vincent Pala-ni matnanganiko Bristibar salo NPP-ni dilgipa aro a·dokni Deputy Chief Minister Prestone Tynsong jegalatenba, iani bidingo uo nanga gita sakkirang donggenchimode sepangbatgipa police station-ona re·ange FIR ka·ena man·aigen ine ra·biatskaaha.
Shillong-oni Jowai-ona dakanggipa ramarango dingtang dingtang gate-rangko kulie MDA sorkari, da·o election-na ATM gita jakkalenga ineba MPCC-ni president matnangatahachim.
Indake ong·engon, uni iandake matnanganirangna NPP-ni dilgipa jegalatskaenba, election-ni somoirango iandake matnanganirangkode manderangan ma·sichakbata ine a·kangatskaaha.
“Chingni kosako iandake matnangna uno sakkirang donga ong·ode ua je somoioba sepangbatgipa police station-ona re·ange FIR-ko ka·na man·aia,” ine Tynsong parakataha.
NPP aro UDP-ni kosako matnanganiranga kakket ong·bebea ong·ode Congress dolo ainni gimin u·i-ma·sigiparang kraa gitan dongna nanga aro uamang niamo pangchake ja·kurangko de·na man·a indiba uamang ja·kurangko de·jaenga ong·ode uan indin matnange roanisan ong·aia ineba a·dokni Deputy Chief Minister parakataha.
MDA-ni ning·o meligrikgijanirang donga ine Congress dolni matnange agananiko jegalatengon, nangrime sorkariko rikenggipa doloni election-o susagrikaniko champengna dongimin niamrang dongama ine Tynsong, sing·doataha.
By-election ong·na sienggipa constituency-rangni manderang, namroro silroroaniko nangengani gimin badia dolna pu·ongen tik ka·mantokaha aro uamang sorkariko chalaienggipa dolrangkosa nangnikbatenga ineba Tynsong parakataha.
