TURA: Re·baenggipa October-ni 30 tariko ong·atna sienggipa Rajabala Assembly constituency-ni by-election-na dingtang dingtang dolrangan kamrangko ka·chichatokengahaon, election-na dongimin niamrangko pe·ahani gimin NPP aro Congress dolgnini kosako badi ka·doangaha.
Badi ka·giparangoni skanggipao, NPP-ni gitcham membor aro da·o Congress dolna kamko ka·enggipa Dr Mizanur Rahman Kazi, by-election-na campaign ka·engmiting somoio NPP-ni dilgiparang, ka·mikkenatani kattarangko aganaha ine badi ka·doangaha.
Koborko on·ani gitade, Garo Hills Autonomous District Council (GHADC)-ni Chief Executive Membor (CEM) Benedic R Marak, Rajabala constituency-ni manderangko NPP-na pu·onjagenchimode a·jak sokskana ka·mikkenataha ine Dr Kazi, West Garo Hills a·jani Deputy Commissioner aro Returning officer-na ku·sikchi badi ka·doangaha.
Dr Kazi-ni ku·sikmangmangchi badi ka·ani gitade, Rajabala constituency-ni Belbari Tillapara songo NPP dolni candidate-na campaign ka·engmiting somoio GHADC-ni CEM, songni manderangko ka·mikkenataha.
“Chingna ua whatsapp-o voice record ka·gipakosan watataiaha aro iano maming candidate, political dol aro ong·atchakgipa biapni bimingkoba janapani dongja. Ian gital chipgipama gitcham chipgipama chinga name ma·sikujaenga maina iano election-ni gimin maming janapaniba dongja. Indake ong·genchimoba chinga iako jako ra·aha aro name nipiltaigen,” ine Dr Kazi-ni badi ka·dogipani bidingo West Garo Hills a·jani Deputy Commissioner Ram Singh parakataha.
Indake ong·engon, Rajabala-ni model skul damsao, skul uniform gangipa bi·sarangko, Congress dolni candidate Hashina Yasmin Mondal-na chake kattarangko mingatahani gimin ia skulni principal-na Rajabala by-election-ni Returning Officer CN Sangma, show cause notice-ko on·angaha ine kobor on·aha.
