Shillong: A·dok sorkarini petrol aro diesel-o dongipa tax-ko komiatna jotton ka·gen Meghalaya-ni Chief Minister Conrad K Sangma, Sonibar salo ka·dongataha.
Mawryngkneng assembly constituency-ni National People’s Party (NPP)-ni candidate Pynidaid Sing Syiem-na Umpling-o bye-election rally-ko ong·atao bakko ra·e aganprakmitingo, party-ni president aro CM Sangma indine aganaha, “petrol toni dam bariako anga nirokatgen, indiba da·ode iani gimin mamingkon agana man·kujawa. A·dokni chief minister ong·e, a·dokni manderangna a·dokni obostako talate on·na nangchongmota, sorkari to dam bariani a·sel manderangni chagrongenggipa neng·nikanirangko komiatna jotton ka·gen.”
‘Niatgenchimode, gipin a·dokrangna bate Meghalaya-on petrol aro diesel-ni tax komibata, sorkarina beben gimaani ong·gen indimangba ia mamlako nirokatgen. Covid-ni somoio namen neng·nikani ong·genchimoba a·dokni namgnina kam ka·gen, ine Chief Minister aganaha.
Uandake opposition dolrangni NPP sorkariko petrol-ni dam barianina matnangana aganchakataon, “a·gilsakni gipin bakrango toni dam bariani a·sel an·chingoba petrol diesel-ni dam barienga ine aganaha.
“Meghalaya sorkarisa tax-ni rate-ko bariata ine ong·ja, kakketko aganchimode an·ching a·dokon rate komibatgipa ong·a, aro mikkangchiba a·dokni manderangni namgniko nigrike rate-ko komie donna jotton ka·gen.”
Uandake Sarva Shiksha Aviyan (SSA) teacher-rangni dormaha man·gija dongengani bidingoba Chief Minister, SSA teacher-rangni dormahako ta·raken on·na jotton ka·gen ine ka·dongataha.
SSA teacher-rangna on·gipa dormaha 90 percent ma·mong sorkarioni sokbagipa ong·a aro 10 percent a·dok sorkarioni ong·skaa, ian 90/10 program ong·a. Uni gimin ma·mong sorkarioniko fund ba tangkako man·sokuja dipetde chinga SSA teacher-rangni dormahako on·na man·ja, ineba Sangma agantalataha.
