SHILLONG: BJP, Rajabala bye election-o Congress-ko ga·akatna miksongesa susaenga, maina ine BJP Meghalaya-ni in-charge M Chuba Ao, aganaha.
Rajabala constituency-ni minority population, BJP-na chakgiparang ong·a, aro BJP-ko minority-oni chel·grikatna jotton ka·ani sal somoirang dongjaha, ine Ao agandapaha.
Rajabala seat-ko man·a political party-rang namen jotton ka·enga aro an·tangtangni party candidate-na campaign ka·tokenga. NPP, Abdus Saleh-ko susaatenga. Uandake UDP-ba Garo Hills-o ja·ku ga·tapna jotton ka·anio Ashahel D Shira-ko chakatatenga. Indake ong·engon Congress, Hashina Yasmin Mondal-ko susaatenga, uan legislator Dr Azad Zaman sagini jikgipa ong·a.
BJP, national party ong·eba, ge·gipin damgni constituency-rang- Mawphlang aro Mawryngkneng-o uamangni candidate-ko susaatjaenga, jena party-ni a·gipi dilgipa AL Hek, suk ong·gijako janapaha.
Uandake Hek-ni agangipa kattana aganchakatengon Chuba Ao, indine aganaha, “ian gitcham Minister-ni an·tangni chanchigipa kattasa ong·a, maina covid sabisini a·sel ua damgni constituency-rango party, unit-ko bilakatna man·jaha, ineba aganaha.
“ Covid sabisini a·sel, chinga ua constituency-rangona sokangna man·jaha, jeni a·sel party bilgriaha, uni gimin chinga damsa constituency-osan gisik on·batenga, ineba Ao agandapaha.
Indake ong·engon BJP-oni darang dilgiparangan Rajabala-ona campaign ka·na sokangkuja, maina BJP-ni top dilgiparang bye election-na campaign ka·tokja indiba Chuba Ao aro state BJP-ni gipin dilgiparang, constituency-o campaign ka·angskagen.