TURA: Rajabala by-election-na campaign ka·ani somoirang bon·roroangengahaon, Mongolbar saloba National People’s Party (NPP) aro Congress dolgnian, Rajabala constituency-ni dingtang dingtang songrango an·tangtangni candidate-na campaign-ko
ka·angtaiaha.
Mongolbar salo, Meghalaya a·dokni Chief Minister aro NPP-ni national president Conrad K Sangma-ni dilanichi NPP-ni tom·bimonganiko Babilgre songo ong·atangaha aro Congress dolba gitcham Minister Zenith Sangma aro gipin dilgiparang baksa Balachanda songo tom·aniko ong·atangskaaha.
Babilgre songo NPP-ni tom·aniko ong·atanio Meghalaya Assembly-ni Deputy Speaker Timothy D Shira, Kharkutta-ni MLA Rupert Momin, GHADC-ni Chairman Rakesh A Sangma aro NCP-ni state president ong·an baksana Gambegre-ni MLA ong·enggipa Saleng A Sangma-ba dongpae NPP-ni candidate-na campaign ka·angaha.
Ia tom·anio a·dokni Chief Minister aro NPP-ni national president, NPP-ni candidate-ko seokchina gita Rajabala constituency-ni manderangko didiangengon, NPP-chi dilenggipa MDA sorkari a·dokna bang·en namroro silroroani kamrangko ra·bana man·aha aro ia by-election-o Rajabala constituency-oba NPP-ni candidate-ko seokgenchimode, Rajabala constituency-na bang·a namgnirangko ra·bana man·gen ine ku·rachakaniko on·angaha.
Rajabala by-election-o NPP-ni candidate Abdus Saleh-ko seokchina gita Babilgre songni manderangko didiangengon, NPP dolara MDA sorkariko dilenggipa ong·a aro sorkario bak ong·gipa dilgiparangsa an·tangtangni constituency-na pilak nanganirangko chu·sokate on·na man·a ine Sangma aganaha.
Ia tom·anio Resubelpara-ni MLA aro Assembly-ni Deputy Speaker Timothy D Shira-ba jinmana aganprakangengon, ua an·tangba NPP dolna ka·sagipa ong·e ia somoioba NPP-ni candidate-ko cheatna gita rake kamko ka·paenga ine parakangaha.
Rajabala constituency-ni Balachanda songo Congress dolni tom·aniko ong·atanio Congress dolni candidate Hashina Yasmin Mondal, jinmana aganprakangskaengon, an·tangni segipa sagi aro Rajabala constituency-ni gitcham MLA Dr Azad Zaman-ni kamrangni gimin aganangenba, ua ia by-election-o seokako man·genchimode Dr Zaman-ni matchotanggijagipa kamrangko chu·sokatna kam ka·gen ine ku·rachakaniko on·angaha.
Ia tom·anio a·dokni gitcham Congress Minister aro Rangsakona-ni MLA Zenith Sangma-ba dongpae jinmana aganprakengon, 2018 bilsi dipet MDA sorkariko rika intalan a·doko pilakni gitan namroro silroroani dongsrangjaha ine NPP-chi dilenggipa sorkariko matnangataha.
Congress dolmangmangsan darang jat aro torom mikkang niteani gri kam ka·gipa dol ong·a ine janapatengon, Rajabala constituency-o namroro silroroaniko ra·bana man·na gita Congress dolni candidate-ko seokchina gita Zenith didiangaha.
