TURA: Re·anggipa Mongolbar waljatchionin East Garo Hills a·jani Rongjeng jolo dakait dake ra·enggipa dolni mande saksako Budbar attamo East Garo Hills a·jani police-rang rim·na man·aha.
Koborko on·ani gitade, Rongjeng Police Station-ni ning·o donggipa Nengpatchi forest gate sambao ia dakait dakgipa manderang, Mongolbar waljatchionin, ia rama gita re·ruraenggipa manderangko dakait dake, uamangni gamchatgipa bosturangko ra·e katahachim.
Budbar attamo ia biapo dakait dakenggipa manderangni gimin Dobu jolo songdongenggipa manderang, Dobu OGC-ona u·iataha aro uandaken ia OGC-oni Rongjeng police station-ona koborko on·atskaenba, bakan ia biapona police-rang re·ange dakait dakgipa manderangoni saksako rim·rikna man·aha.
“Police-rang Nengpatchi forest gate-ona sokangon, dakait dakgipa manderangoni saksa, an·tangni bike-o Dobu-chipak sale katna jotton ka·ahachim indiba Dobu bazar sambao uni bike ga·akenba police-rang uko rim·na man·aha,” ine East Garo Hills a·jani SP Bruno A Sangma parakataha.
SP-ni u·iatani gitade, ia mandeara Williamnagar-oni Roby R Marak minggipa mande ong·achim aro uko police-rang rim·ani ja·man sing·sandikuna gita Rongjeng police station-ona rim·angaha.
“Chinga ia dakait dakgipa dolni gipin manderangkoba rim·na sandiengkua,” ineba Sangma parakataha.
