TURA: Meghalaya a·dokni damgittam Assembly constituency-ni by-election-na Budbar attamon campaign ka·ani matchotangahaon, ia apsan attamon Rajabala Assembly constituency-o NPP aro Congress dolgnini gisepo dinggrikanirangko nikna gita man·aha aro 
ia dinggrikanio dolgnionin gimik sak 11 manderang saknaanirangko man·na gita nangaha.
Koborko on·ani gitade, Budbar attamo Congress dolni tom·a matchotani ja·man, Congress dolna kam ka·enggipa manderang uamangni candidate Hashina Yasmin Mondal-ni nokona Rajabala-ni ramarang gita jinma re·jomangengmiting somoio, uamangoni mitam NPP-ni poster-rangko chitna a·bachengaha. NPP-ni poster-rangko chitani gimin NPP-ni manderangba Congress dolni manderangko ro·ong gona a·bachengaha aro uandaken ja·mano dolgnini gisepo adita dinggrikani ong·kataha.
“Chingni kobor man·soani gitade, NPP-ni poster-rangko chitani gimin NPP-ni manderang, Congress dolni membor-rangko ro·ong gona a·bachengaha aro ja·mano Congress dolni manderangba, songni gaonbura Hasan Ali-ni nokko ro·ong goruruna a·bachengaha aro ja·mano uni nokni berako pe·drae, uni nokni ma·manti gam-jinrangko nisie galaha,” ine West Garo Hills a·jani SP Vivekanand Singh, kobor ra·timgiparangna parakataha.
Dolgni ro·ong gogrikanio NPP aro Congress dolgnionin komibeoba sak 11 manderang saknaanirangko man·na nangaha ineba SP parakataha.
