SHILLONG: October-ni 30 tariko ong·atenggipa Meghalaya a·dokni damgittam Assembly constituency-ni by-election-na official-rangni nirok sandianio ia damgittam constituency-rangoniko gong lak 1.5-mangni churangko rim·na man·aha ine Bristibar attamo a·dokni Chief Electoral Officer (CEO) FR Kharkongor parakataha.
Ia churangko election official-rang, damgittam Assembly constituency-ni dingtang dingtang biaprango nirok sandianirangko dakengmiting somoio rim·na man·aha ineba Kharkongor parakataha.
CEO-ni parakatani gitade, dingtang dingtang political dolrangni aro candidate-rangni koros ka·anirangkoba expenditure observer-rang nirikkienga aro iana official-rang, dingtang report-ko Election Commission-na on·anggen.
Indake ong·engon, da·o dipet ia damgittam constituency-rangon tangka ra·bitarangko rim·a man·na dongkuja ine Kharkongor parakataha.
“Bank-rangoniko gong 50,000/-na bate oka donggenchimode ba iandake tangka chipatanirang donggenchimode koborko on·china gita deputy commissioner-rang, dingtang dingtang bank-rangna sedoataha,” ine CEO parakataha.
