Rajabala-o dolgni dinggrikgipani bidingo enquiry-ko dakchina Returning Officer ge·eta

TURA: Re·anggipa Budbar attamo, Congress dolni tom·bimonganiko ong·atani ja·man Rajabala constituency-ni Garodubi songo National People’s Party (NPP) aro Congress dolna kam ka·enggipa manderangni dinggrikgipani bidingo enquiry-ko dakchina gita Rajabala Assembly by-election-ni Returning Officer (RO) ge·etaniko on·angaha.
Ia a·selni bidingo Returning Officer-ni District Election Officer (DEO)-na report-ko on·ani gitade, Congress dolni tom·aniko ong·atani ja·mano dongimin niamko manigija jinma re·jomaniko ong·atangani a·selsa Garodubi songo dolgni dinggrikaniona sokaha.
Returning Officer-ni report-o parakani gitade, Indian National Congress-ni tom·bimonganiko attam 1:00 bajioni attam 4:00 bajionasan Rajabala Higher Secondary School-o ong·atna gita permission-ko on·aiahachim indiba tom·a matchotani ja·mano Congress dolni manderang, somoi batpile Rajabala songoni Gomaijora songona jinma re·jomangahachim.
“Tom·a matchotani ja·mano dolsa manderang, Rajabala bazar gita Garodubi, Magurmari, Pershakandi, Morasuti, Nayagaon, Old Bhaitbari, Khetadowa aro Gomaijora-ona kingking re·jomangaha. Ian permission on·gimin somoina bate uamangni kam ka·aniko mesokani ong·aha,” ine RO-ni report-o parakataha.
Dolgni dinggrikanio Congress aro NPP dolgnionin sak 21 manderang adita saknaanirangko man·aha aro uamangko hospital-o sanenba watpilaiaha ineba Report-o parakaha.
Iani bidingo kobor ra·timgiparang baksa agangrikengon, iandakgipa political tom·bimonganirangko ong·atna gita ming 20 niamrangko Election Commission on·manahachim ine Returning Officer CN Sangma parakataha.
“Ia niamrangoni mingsara manderangni aro bike rally-ko champenganian ong·achim indiba ia manderang ia niamko pe·aha,” ine Returning Officer parakataha.
Tom·a matchoton ia manderang noktangtangchi re·angani pal, jinma re·jomanikosa ong·atskaaha aro iani a·selsa ja·mano dolgni dinggrikaniona sokaha ineba ua parakataha.
Dolgni dinggrikanio, Garodubi songni gaonbura aro VEC-ni secretary Hasan Ali-ni nokko chadrape nosto ka·aha ineba RO-ni report-o parakataha.
Indake ong·engon, ia a·selni bidingo Congress dolni candidate Hashina Yasmin Mondal-ni election agent saksaba FIR ka·doangskaaha aro uni FIR-o parakatani gitade, ua somoio NPP aro Congress dolgnian dingtang dingtang biaprango tom·bimonganiko ong·atengani gimin dolgnini gisepo chagrongjana gita ua ramako dingtangatahachim.
“Ua somoio NPP dolba New Bhaitbari-o aro Congress dolba Rajabala-o tom·aniko ong·atengani gimin tom·a matchotani ja·man ia biap damgnio tom·enggipa manderangni garirang chagrongjana gita anga garirangko Patranga-o donggipa AMP ramao sokena gita Garodubi-Magurmari-Bharali bypass gita watatskaahachim,” ine Congress candidate-ni election agent Abdul Aziz, uni FIR-o parakataha.
Congress dolni mitam manderangde gimaengkua ineba ua ia manderangko rim·gittangahakon ba so·otahakon ineba ua uni FIR-o a·kangatahachim indiba uni iandake agananiko police-rang jegalatskaaha.