SHILLONG: Sonibar salo damgittam constituency-rang- Mawphlang, Mawryngkneng aro Rajabala-o by-election-o ong·atao 80.86 percent voter-rang puonangtokaha. Aro gimik constituency-rangon namen tom·tomen matchotangaha, ine Chief Electoral Officer FR Kharkongor koborna u·iataha.
West Garo Hills Rajabala-o 90 percent voter-rang puontokaha, damgittam constituency-rang East Khasi Hills district- Mawphlang aro Mawryngkneng aro Rajabala-o ong·atgipa bye-poll-ko niatgenchimode Rajabala-on bang·bate manderang puontokaha. Mawphlang-o 75.97 percent aro Mawryngkneng-o 74.69 percent ong·a.
Mawphlang constituency-o atam 7 bajiona 76.90 percent voter-rang puontokaha, Mawryngkneng-o 75.06 percent voter-rang puontokskaha.
Uandake Rajabala-o atam 7 bajiona vote on·ako niatgenchimode bang·bate 90.63 percent voter-rang puontokaha.
Khorkongor-ni koborna u·iatani gitade, by-election-o bilsi bregiminrangsan ong·aija skanggipa changna vote ong·giparang aro gimik bilsini voter-rangan bak ra·tokaha. Minggipin vote on·chenggipa voter-rangna certificate-koba on·aha.
Indake ong·engon by-election-ko ong·ataon covid-ni niamko ja·rike ong·ataha aro gimik polling station-rangon nodal health worker-rangko donataha. Aro covid-ni protocol -ko ja·rikaha.
Iarangni gisepon by-election-ko jakkalgipa ge 6 VVPATS-ni kam ka·gijanikoba kobor man·soaha, Mawphlang-oni ge 2, Mawryngkneng-o ge 1 aro Rajabala constituency-o ge 3 VVPATS name kam ka·jaha, indiba quick response team, ta·raken name kam ka·gija machine-rangko bodolataha.
Dam 3 constituency-rangni chu·gimik dam 168 polling station-rango sak 10,2695 elector-rang puontokaha.
Indake ong·engon Lad Mawreng-oba machine name kam ka·gijaniko kobor man·soaha, jeni a·sel atamonan voter-rang puontokangaha.
Kharkongor-ni u·iatani gitade, damgittam constituency-o ong·atgipa by-election, maming neng·nika gri tom·tomen matchotangaha.
Uandake mitam polling station-rango covid facility dongjani gimin sing·on, Kharkkongor indine aganchakaha, “iani bidingo Deputy Commissioner-oniko report-ko sandigen.”
Bye-election-ko matchotani ja·man da·ode Election department, November jani 2 tariko vote-ko channa kam ka·na re·mikkangatengjok. November 2 tariko pring 8 bajioni a·bachenggen.
Shillong-ni JN Stadium aro Tura-ni SMELC centre-ni sepango donggipa building counting centre-rango covid protocol-rangko ja·rike vote-ko channanggen.
EVM-na gadang gittam security donggen jekon CAPF, CRPF aro a·dok police dolrang nirokangskagen. Counting-ni somoio ge 5 VVPATS-ko de·e, election-ni somoio puonako meliate nigen.
Iarangna agreba counting-ni somoio checking ka·aniko arrange ka·gen aro election-o chegipa candidate-rangna counting centre-oni uamangni noktangtangona chelchakaniko on·gen.
Uandake Election department counting-ni salna gital guideline-ko on·gen.
Ia changni bye-election-o EVM M3 vareity-ko jakkalaha, ia EVMs-o in-built visual display donga aro battery predictor-ba donga. Ia machine-ko saoba dakjea ba kal·akna jotton ka·ode skatangan factory mode-ona re·angaia.
