TURA: Adita salrangna skang, Rajabala Assembly constituency-ni by-election-na campaign-ko ka·ani ja·man Congress dolni re·jomengmiting somoio NPP dolni manderang baksa dinggrike adita sak manderang saknaanirangko man·na nangahani gimin police-rang saksni manderangko rim·dape judicial custody-o donataha.
Ia a·sel ong·ani ja·mano police-rang, sakgittam manderangko rim·e judicial custody-o donatahachim aro da·o gipin saksni manderangkoba rim·dape judicial custody-o donataha ine West Garo Hills a·jani Superintendent of Police (SP) VS Rathore, kobor ra·timgiparangna u·iataha.
Ia saksni manderangko channe da·o ia a·sel ong·anina rim·ako man·giparang gimik sak 10 gapengaha.
Adita salrangna skang dolgni ro·ong gogrike dinggrikanio gimik sak 12 manderang saknaanirangko man·na nangahachim aro ia songni gaonburani nokkoba ia manderang nisie galahachim.
Indake ong·engon, ia a·sel ong·anina skang rim·ako man·gipa mande sakgittamba pu·onanio bakko ra·pana man·na gita pattokoniko watpilchina Congress dol didiahachim indiba ia manderangko judicial custody-osa donatahani gimin watpilna niam dongja ine West Garo Hills a·jani SP parakatskaaha.
“Garodubi-o dolgnini dinggrikanio jak dongani giminsa ia manderangko rim·aha aro uamangko watpilchina dabianiara niamo ong·jaenga,” ine Rathore parakataha.
