TURA: Rajabala by-election-ko Congress aro National People’s Party (NPP) dolrang chena gita ka·dongtokengon, United Democratic Party (UDP)-ni candidate aro Rajabala-ni gitcham MLA Ashahel D Shira-ba ia by-election-ko chena ka·dongbatskaenga.
“Ia by-election-o susana gita bang·a manderangan angna dakchake on·aha. Anga a·bri jolni bang·bata vote-rangkon chena ka·dongenga aro a·kawe jolrangonikoba bewalkon man·na ka·dongenga. Bangki vote-rangkode Congress aro NPP-ni gisepo sualgriknaba gnang,” ine UDP-ni candidate Ashahel D Shira parakataha.
Iani bidingo Congress aro NPP-ni candidate-rang baksade agangrikna cholko man·skajaha.
Rajabala constituency-ni a·bri jolrangon komibeoba sak 13,000-mangni gita pu·ongiparang donga aro ia constituency-ni a·bri aro a·kawe jolrangko changope pu·ongiparang hajal 20-na baten dongachim.
2018 bilsini Assembly election-o Rajabala constituency-o pu·onani 93.46 percent gapahachim aro ua somoio sak 27,188 manderang, an·tangtangna on·gimin bilko jakkale dilgipako seokahachim.
Ua somoio Congress dolni candidate Dr Azad Zaman, 7420 vote-rangko man·aha aro Independent candidate ong·e susagipa Ashahel D Shira, 6482 vote-rangko man·skaahachim. Ia changode Shira, UDP-ni candidate ong·e susaskaengachim.
Rajabala-ni gitcham MLA Dr Azad Zaman-ni biapo uni jikgipa Hashina Yasmin Mondol, Congress dolni candidate ong·e ia change susaskaenga.
2018 bilsini Assembly election-o party tikitrangko man·rikjae, da·o NPP-ni candidate ong·e susaenggipa Abdus Saleh-ba Independent candidate ong·e susaskaahachim aro ua somoio ua 5178 vote-rangko man·rikgipa NPP-ni candidate Dr Mizanur Rahman Kazi-na 713 vote-rangko bate man·skaahachim. 2018 bilsini Assembly election-o Abdus Saleh, gimik 5891 vote-rangko man·ahachim.
Ia bilsini by-election-o ia candidate sakgittaman chena ka·dongtokengon knal Mongolbar salosa vote-rangko channa siengani gimin uamangni rasirangkode ua salosa nikna man·aignok.