TURA: Sonibar salo ong·atanggipa Rajabala Assembly constituency-ni by-election-o bang·bata manderang, an·tangtangni gital dilgipako seokanio bakko ra·tokahaoba electoral roll-o biming donggipa manderangoni sak 3069 manderangde dilgipako seokanio bakko ra·skajaha.
Meghalaya a·dokni damgittam Assembly constituency-ni by-election-ko Sonibar salo ong·atangahachim aro ia constituency-rangara Rajabala, Mawryngkneng aro Mawphlang constituency ong·achim.
Mawryngkneng aro Mawphlang constituency-ko toe Rajabala-o bang·bata manderangan pu·onna gita gisik nangtokgenchimoba sak 3069 pu·ongiparangde dingtang dingtang a·selrangchi an·tangtangni dilgipako seokanio bakko ra·skana man·jaha.
Rajabala constituency-o gimik sak 32,750 pu·ongiparang donga aro ianoni sak 29,681 manderangde an·tangtangna on·gimin bilko jakkale dilgipako seokaha indiba sak 3069 manderangde pu·onanio bak ra·skajaha.
Election changantian Garo Hills-ni a·kawe jolrangode manderang gisiko nange election-ni kamrango bakko ra·tokronga aro ia by-election-oba campaign ka·aniko a·bachengaoni campaign ka·ani matchotaona kingkingan dingtang dingtang biaprango manderangni gisiko nangbee bak ra·anirangko nikna man·ahachim.
Pu·onani saloba polling station-rangko kulichengaonin dingtang dingtang polling station-rango manderangni bang·bee pu·onna gita riting dakanirangko nikna man·aha aro uandaken mitam polling station-rangode somoi batpilona kingkingan bang·bea manderangni pu·onna senganirangko nikna man·kuaha.
Election-ni somoio Batabari aro Old Bhaitbari polling station-rangode ge VVPAT machine-rang nosto ong·change ia machine-rangni pal gipinko jakkalskana nangahachim.
Rajabala-o sak 3000-na baten pu·ongiparang dilgipako seokanio bak ra·ja
Date:
Share post:
