TURA: Internet gita manderangko cha·bokanio jak dongani gimin East Garo Hills a·jani police-rang, Nigeria a·songni mande saksa baksana Naga me·chik saksako re·anggipa Robibar salo, Delhi songjinmaoniko rim·na man·aha.
Police-rangni kobor on·ani gitade, Nigeria a·songni Felix minggipa mande baksana Naga me·chik saksani kosako cyber gita gong lak 2 tangkarangko cha·boke ra·ahani gimin Williamnagar-o FIR ka·ahachim aro uandaken Robibar salo ia mande sakgniko East Garo Hills a·jani police-rang, Delhi-ni police-rang baksa nangrime Delhi songjinmani Tilaknagar joloniko rim·na man·aha.
Ia mande sakgnioniko police-rang, ge 11 mobile phone-rang baksana ge 18 ATM card-rangkoba man·aha.
Indake ong·engon, ia mande sakgniko talbate sing·sandiangkuna gita Williamnagar-ona rimbaenga ine East Garo Hills a·jani police-rang u·iataha.
