TURA: Meghalaya a·doko aro mongsongbate Garo Hills-oba salantian gita dake petrol aro diesel-rangni dam rakbatroroengani a·sel ramram manderangsa neng·nikanirangko chagrongna nangtokengahani gimin A·chik Holistic Awakening Movement (AHAM) suk ong·gijaniko parakatenba, iani bidingo dingtang dingtang para salenggipa garirangni association-rang baksa nangrime Garo Hills-o jingjengataniko dakna tik ka·angaha.
AHAM-ni vice president George Prince Cheran Momin-ni parakatani gitade, ia sal somoirango salantian petrol aro diesel-rangni dam tang·dorikrikbaengani a·sel gari gorarangko jakkalenggipa manderangsan ong·aigija ramram manderangba neng·nikanirangko chagrongna nangtokengahachim.
“Petrol aro diesel-ni damrang rakbatrorobaengahani a·sel gipin nangchongmotgipa bosturangni damba tang·dorikrikskaengaha aro iani a·selan manderang neng·nikanirangko chagrongna nangtokenga. Petrol aro diesel-ni kajinarangko sorkari komiate manderangna rang·speaniko on·na nangchongmota,” ine Momin parakataha.
Iani bidingo AHAM-ni dilgiparang, dingtang dingtang NGO-rang aro pik up association, bus, truck, maxi taxi, auto aro uandakgipa association-rang baksa agangrikaha aro mikkangchi iandake petrol aro diesel-rangni dam tang·dorikrikengani gimin sorkarini kosako jegalna gita jinma tom·bimonge re·jomaniko ong·atna tik ka·aha ineba AHAM-ni vice president parakataha.
Iani bidingo maming ku·rangko on·jaengani gimin AHAM-ni dilgiparang, a·dokni dingtang dingtang MLA-rangkoba matnangataha aro uamangni ku·rang on·jaengania an·tangtangni constituency-rango donggipa manderangna simsakgijaniko mesokani ong·enga ine parakataha.
