TURA: Rajabala Assembly constituency-ni by-election-o National People’s Party (NPP)-ni candidate Abdus Saleh, Congress dolni candidate Hashina Yasmin Mondal-ko 1927 vote-rangchi chena gita man·aha.
Mongolbar pringo Rajabala by-election-ni vote-rangko changsku dake chanangani ja·man NPP-ni candidate Abdus Saleh, 11,812 vote-rangko man·aha aro 9885 vote-rangko man·rikgipa Congress dolni candidate Hashina Yasmin Mondal-ko 1927 vote-rangchi cheangaha.
Ia by-election-o United Democratic Party (UDP)-ni candidate Ashahel D Shira-ba bilaken susaahaoba 7,228 vote-rangkosan man·rikaiaha aro uandaken ua gittamgipa biapko man·rikskaaha.
Bharatiya Janata Party (BJP)-ni candidate Kingstone B Marak aro Independent candidate Carla R Sangma-de bang·e vote-rangko man·rikpajaha maina BJP-ni candidate 329 vote-rangko aro Independent candidate 253 vote-rangkosan man·rikaiaha.
Rajabala by-election-o gimik sak 29,681 manderang pu·ontokahachim aro ianoni sak 174-de NOTA-ko sikdepe pu·onskaaha.
Vote-rangko chanengmiting somoio brigipa round-ona kingkingde Congress dolni candidate aro NPP-ni candidate biltinggrika gita ong·kuengachim maina ia brigipa round-ona kingkingde uamang sakgnini gisepo 90 vote-rangchisan batengkuachim. Indake ong·genchimoba, bongagipa round-onide bon·kamgipaona kingkingan NPP-ni candidate Abdus Saleh, Congress-ni candidate Hashina Yasmin Mondal-na batroroangaiaha.
Rajabala constituency-ni gital MLA Abdus Saleh, skangoba changgittamna kingking Mahendraganj constituency-ni MLA ong·angahachim indiba 2013 bilsio Mahendraganj constituency-ko reserved seat dakatani ja·man ua Rajabala constituency-ona apjitbaskaaha aro untalan ua seokako man·taikujaengachim.
Ia by-election-o ua seokako man·taiahani gimin bilsichetni ja·man MLA ong·piltaina cholko man·aha.