AMPATI: South West Garo Hills a·jao donggipa Kalaichar border haat-ko kulipilna gita Bangladesh sorkari baksa agangrike kamko ka·china gita South West Garo Hills a·jani Deputy Commissioner Ch Ramakrishna, Kalaichar BOP-o donggipa 28 Battalion BSF-ni Assistant Commandant-na chittiko sedoataha.
A·jatangtango COVID-19-ni obostarangko nigrike re·anggipa September jaon Meghalaya sorkari, border haat-rangko kulipilchina gita deputy commissioner-rangna ge·etaniko on·angahani gimin da·o Kalaichar border haat-koba kulipilna Bangladesh sorkari baksa agangrikna nangengaha ine SWGH a·jani Deputy Commissioner, 28 Bn BSF-ni Assistant Commandant-na seatgipa chittio parakataha.
Meghalaya sorkarini on·gimin ge·etanio pangchake a·jao donggipa dingtang dingtang border haat-rangkoba COVID-19-na dongimin niamrangko ja·rike kulipiltaina gita SWGH a·jani district administration, dingtang u·iatanikoba on·angaha.
Indake ong·engon, a·song damgnini simarango songdongenggipa manderangni namgnina Kalaichar border haat-ko kulipilna man·na gita Bangladesh-ni sipairang baksa agangrikskachina ua BSF-ni official-rangkoba didiataha.
