TURA: Meghalaya a·doko gitchambatsranggipa a·jarangoni damsa ong·engoba South Garo Hills a·jao da·onan bijoliko name man·jaengani gimin South Garo Hills a·jao songdongenggipa manderangna bijoliko nambate on·china didie, South Garo Hills a·jani dingtang dingtang NGO-rang, jekai GSU Southern Zone, AHAM Southern Zone, ADE Baghmara regional unit, GSMC Baghmara unit, Constitutional Rights Forum (CRF), FKJGP Baghmara circle aro uandakgipa dolrang, Meghalaya a·dokni Chief Minister Conrad Sangma-na sedoataha.
NGO-rangni parakatani gitade, South Garo Hills a·jako man·chengaonin MeECL-ni sub-divisional office-ko songahaoba a·jao songdongenggipa manderangna bijoliko suale on·anio maming namdapanirang dongkujaengachim aro iani bidingo NGO-rang, changni chang sorkarina u·iatahaoba maming ja·kurangko de·kujaengachim.
“South Garo Hills a·jao songe on·gipa power line ba utility pole-rangara mikka balwa rakani somoirangode nosto ong·rongaia aro iandakgipa krongrangara, Siju aro Aretika-ni buring bolgrimrangosa ong·e da·o gita wachi ba mikka balwarang ta·rakani somoiode bolrang be·dape ba bijoli silitingrang chote nosto ong·atako man·ronga. Wachini somoirango bijoli nosto ong·ahaode ia nosto ong·gipa bakrangko taripilna gita komibeoba salgittamrangkode nangaiani a·selan jolo songdongenggipa manderang neng·nikanirangko chagrongna nangrongenga,” ine NGO-rang parakatenba, South Garo Hills a·jao songdongenggipa manderangni neng·nikanirangko chel·chakna gita 132 KV grid power line-ko songe on·na nanga ine a·dok sorkario dabiangaha.
South Garo Hills a·jao donggipa transformer-rangni gimin janapatengon, a·jani bang·bata biaprangon transformer-rang gitcham ong·tokahani gimin nosto ong·rongenga aro ia transformer-rangni biapo ta·raken gitalko on·na nanga ine NGO-rang dabiangaha.
