SHILLONG: Adita salrangna skang matchotanggipa Rajabala Assembly constituency-ni by-election-o bang·bata dolrangan tangka paisarangko sualaha ine ia by-election-o chu·sokpana man·gijagipa Bharatiya Janata Party (BJP)-ba matnangataha.
Rajabala by-election-o BJP-ni candidate Kingston B Marak, 329 vote-rangkosan man·rikaiahachim.
Indake ong·engon, ia by-election-o BJP dolni chu·sokgipa ong·na man·jahani gimin talataniko on·angengon, ia by-election-o gipin dolrang tangka paisarangko suale susaaha aro BJP-ni candidate-ba politics-o napdaldalgipasa ong·kuengani a·sel chu·sokgipa ong·na man·jaha ine BJP-ni state president Ernest Mawrie parakataha.
Mawrie-ni aganani gitade, ia a·selrangna agreba, Rajabala jolo jasamangna skangsan BJP-ni mandal committee-ko songaha aro office bearer-rangba songdaldalgiparangsa ong·ani gimin Rajabala constituency-o ia by-election-na kamrangko ka·srapjahachim.
“Rajabala constituency-ni a·bri aro a·kawe jolrangoba chingni voter-rang dongani giminsa chinga candidate-ko susaataha. Ia by-election-o chinga namroro silroroaniko ra·bana miksongesa susaaha aro tangka paisarangchi pu·ongiparangko brejaha,” ine Mawrie parakataha.
2023 bilsini Assembly election-na uamang rakbate kamrangko ka·skagen ineba BJP-ni state president parakataha.
Indake ong·engon, by-election-o chena gita tangka paisarangko jakkalaha ine matnanganiko NPP raken jegalatskaaha.
Adita salrangna skangsan Congress dolba, MDA-o bakrimenggipa dolrang ia by-election-o bang·en tangka paisarangko jakkalaha ine matnangatahachim.