TURA: Tura-oni A·sakgre songona dakanggipa ramako sorkari jako ra·ahaoba da·alonan ia ramako tarie on·na dongkujaengani gimin Asakgre, Agalgre, Papagre aro uandakgipa songni manderang, apsan nangrime ia ramako taritokaha ine kobor on·aha.
Songko nokko dilgiparangni u·iatani gitade, ia ramako PWD jako ra·ahaoba da·onan ia ramako tarie on·kujaengani gimin songni nokni manderang re·a doanirango neng·nikanirangko man·tokenga ine nike songni manderang apsan nangrime ia ramako taritokaha.
“Ia ramako tarichina gita chinga ru·uta bilsirangonin dingtang dingtang dilgiparangko gronge mol·molahachim aro uamangoni bang·batan ia ramako tarie on·na ku·rachakahaoba darangba tarie on·chipjaha. Uni giminsa chinga chol ong·teljaengaha ine nike wilwilao donggipa dingtang dingtang songni manderang baksa nangrime ia ramako tariaha,” ine Askagre songni me·chikma saksa Melmoni M Sangma parakataha.
