SHILLONG: Meghalaya a·dokni bang·bata biaprangon COVID-19-na tika su·anirang komikuengani gimin Krismasna skangan bilsi sokgimin manderangna tika su·aniko matchotatna sorkari jotton ka·gen ine a·dokni Chief Minister Conrad K Sangma parakataha.
“Ia somoirangara manderangni kusi ong·e maniani somoirang ong·engaha aro Krismasna skangan chinga a·dok gimiko tika su·aniko 100 percent gapatna nisanko done kam ka·gen,” ine Chief Minister, kobor ra·timgiparangna parakataha.
Sangma-ni parakatani gitade, Krismasni somoirango manderang kusi ong·e noktangtangoni ong·katna aro manina man·na gita tika su·aniko matchotatna sorkari nisanko donenga.
Iani bidingo sorkari, salsa salgnini gisepon chanchirime re·baenggipa antirango aro mikkang jao tika su·aniko bilakbatatna jotton ka·gen ineba Chief Minister parakataha.
Koborko on·ani gitade, re·anggipa Mongolbar salona kingkingde Meghalaya a·dok gimiko tika su·e ra·na nangenggipa manderangoni gimik sak 11,06,319 manderangde skanggipa tikako su·e ra·manaha aro sak 6,55,517-de tika ponggnikon su·e ra·mantokaha.
Budbar salo a·songni Prime Minister Narendra Modi, tika su·a komikuenggipa dingtang dingtang a·jarang baksa internet gita agangrikangaha aro ia tom·anio a·dokni Chief Minister Conrad Sangma-ba bakko ra·angahachim.
Indake ong·engon, ia tom·anio a·song gimikni sak 9 deputy commissioner-rang, a·songni Prime Minister baksa a·jatangtango tika su·ani gimin agangrikangaha aro ia sak 9 deputy commissioner-rangoni saksade East Garo Hills a·jani deputy commissioner ong·achim ine Sangma parakataha.
