SHILLONG: Tangka paisarangko satani giminsa NPP, by-election-rango chena man·aha ine Congress-ni matnangani gimin, sakki dongode mesokchina gita NPP, Opposition Congress-ko ra·biaha.
Congress, ian daito gnanggipa dolsa national party, unigimin party-na kraa gita re·bo ine aganan baksa, ‘‘namgijagipa bilgrigipa ong·nabe, tangka sata ine maming sakki gride gipin party-rangko matnangani palde, manderangni na·simangko jegalaniko ra·chakbo’’ ine WR Kharlukhi aganaha.
Chinga niksamsoe kam ka·enga aro uamangni je kamrangko ka·genchimoba manderangko bebera·atna gita sakki gnang kamrangko ka·enga ineba ua agandapaha.
An·tangtang cherikjaenba NPP-ko tangka sata inaiode ong·ja, NPP-o indakgipa kam ka·anirang dongja, sakki dongode mesokbo, aro sakki dongode FIR on·ja ineba Kharlukhi, Congress-ko ra·bie aganaha.
“Manderang na·simangko namnikjaha ine ma·sie uamangni raiko ra·chakbo, na·simang maina tol·enga. Maming sakki gride indinari matnangchae rona nangja,” NPP dilgipa aganaha.
Congress, Meghalayao bilsi 30-na baten sason ka·aha, ia bilsi 30-ni gisepo a·dokni manderangna maiko dakaha, uko manderangna aganbo, bilsi gittam adha-ni gisepo chinga mairangko chu·sokataha chingade uamangko manderangna agana aro ian uni bitede ong·kataha,’’ Kharlukhi aganaha.
Indakeba nikatna man·a je, ru·uta somoirangna Congress-ni bilake jakkepe dongenggipa Mawryngkneng aro Rajabala assembly constituency-rangko mija by-poll-o NPP jako man·aha.
