SHILLONG: Meghalaya a·dokni dam 12-gipa district, chong·motan Mairang district-ko re·baenggipa November 10 tariko, Meghalaya a·dokni Chief Minister Conrad Sangma, nokdonggae on·anggen ine Meghalaya Legislative Assembly-ni Speaker Metbah Lyngdoh parakataha.
Meghalaya Assembly-ni Speaker Metbah Lyngdoh an·tangan Mairang-ni MLA-ba ong·engachim ine nikna man·a.
“Meghalaya a·dokni dam 12-gipa district-ko nokdonggaani bidingo Cabinet tom·e chanchirimanggen indiba nokdonggae on·ani tarikkode tik ka·manaha,” ine Lyngdoh aganaha.
Lyngdoh-ni parakatani gitade, ru·uta bilsirangonin Mairang Civil Sub-Division-ko district songchina gita jolo songdongenggipa manderang dabitokengachim aro ia dabiani da·o chu·sokgipa ong·na man·engahachim.
“Manderangni ru·utbea bilsirangna nikenggipa jumang da·o be·en pil·na man·engahani gimin anga namen kusi ong·a,” ine Mairang-ni MLA aganaha.
Ia gital district ba a·jao Mairang aro Mawthadraishan constituency-ni ning·o donggipa songrangko man·chapna siengachim.