TURA: Meghalaya a·dokoba petrol aro diesel-rangni dam rakkuengani a·sel ramram manderang neng·nikanirangko man·na nangengani gimin petrol, diesel aro LPG-ni damkoba komiatkuchina gita A·chik Holistic Awakening Movement (AHAM), a·dok sorkario dabiangaha.
Petrol-ni kajinako gong 5-chi aro diesel-ni kajinako gong 10-chi ma·mong sorkarini komiatani ja·man a·song gimikon petrol aro diesel-rangni dam aditade komiangahachim ine nikna man·a.
Indake ong·genchimoba, Meghalaya a·doko petrol-ni dam gong 100 gapna siengkuani a·sel gari gorarangko jakkalenggipa manderangsan ong·aigija pilak manderangan neng·nikanirangko man·tokna nangkuengani gimin petrol, diesel aro LPG-ni damko komiatkuchina gita a·dok sorkario dabiangaha.
“Petrol aro diesel-ni kajinarangko ma·mong sorkarini komiatani ja·manoba Meghalaya a·doko petrol aro diesel-ni damrang namen rakengkua, uni gimin a·doko songdongenggipa manderangni namgnina Meghalaya sorkarini gitaba kajinarangko komiatchina chinga dabienga,” ine AHAM-ni vice president George Prince Cheran Momin parakataha.
Revenue-rang dongsrangjaengani gimin petrol aro diesel-rangni kajinarangko Meghalaya sorkari da·o dipet komiatna man·kujawa ine adita salrangna a·dokni Chief Minister Conrad Sangma-ni agangipa kattarangko jegalatengon, ma·mong sorkarini kajinarangko komiatahani a·sel a·doko petrol aro diesel-ni damrang bang·gija komiangaha aro kajinarangko komiatna gita ma·mong sorkarian a·dok sorkarirangna bilko on·ahachim ine AHAM-ni vice president parakataha.
Indake ong·engon, uamangni dabiani gita petrol, diesel aro LPG-rangni damko a·dok sorkari komidapatjagenchimode uamang Garo Hills-ni dingtang dingtang biaprango jingjengatanirangko dakanggen ine AHAM-ni dilgiparang, mikrakataniko on·angaha.
